ព័ត៌មានអន្តរជាតិ

ប្រភពរូបភាព៖ South China Morning Post

ចក្រភពអង់គ្លេស​ ​ក៏​ដូច​ទៅ​នឹង​ប្រទេស​មួយ​ចំនួន​ទៀត​ដែរ​ ​គឺ​មិន​មាន​ទំនាក់ទំនង​ការទូត​ផ្លូវការ​ជាមួយ​កោះ​តៃ​វ៉ាន់​នោះ​ទេ​ ​ប៉ុន្តែ​ខ្លួន​នៅតែ​ប្រកាស​ពី​ការ​ព្យាយាម​បង្កើន​ការ​គាំទ្រ​ ​បន្ទាប់ពី​កោះ​នេះ​កំពុង​ប្រឈមមុខនឹង​ការ​គំរាមកំហែង​ផ្នែក​យោធា​ពី​ក្រុង​ប៉េកាំង​។​

​ដ្បិត​ថា​ ​សហរដ្ឋអាមេរិក​ ​គឺជា​ប្រភព​អាវុធ​បរទេស​ដ៏​សំខាន់​បំផុត​របស់​កោះ​ ​ប៉ុន្តែ​ក្រុមហ៊ុន​អង់គ្លេស​ជាច្រើន​ ​បាន​ជួយ​អភិវឌ្ឍ​នាវាមុជទឹក​តៃ​វ៉ាន់​ដែល​ផលិត​ក្នុងស្រុក​ ​ហើយ​នៅ​ពេល​មាន​សំណួរ​ថា​ ​តើ​អង់គ្លេស​គួរ​ជួយ​គាំទ្រ​តៃ​វ៉ាន់​សម្រាប់​ផ្នែក​យោធា​ ​ទោះ​ជា​ជំនួយ​អាវុធ​ ​ឬ​ការ​ចែករំលែក​ព័ត៌មាន​សម្ងាត់​ណាមួយ​ដែរ​ឬទេ​ ​លោក​ ​To​bias​ ​E​l​l​wood​ ​ដែល​ជា​សមាជិកសភា​អង់គ្លេស​ ​បាន​ឆ្លើយ​ថា​ ​ច្បាស់ជា​ជួយ​។​

សមាជិក​សភា​រូប​នេះ​ ​បាន​លើកឡើង​យ៉ាង​ដូច្នេះ​ ​«​ចក្រភពអង់គ្លេស​បាន​បោះជំហាន​ទៅមុខ​ច្រើនជាង​ប្រទេស​ដទៃទៀត​ក្នុង​ការ​ជួយ​អ៊ុយ​ក្រែ​ន​ ​ហើយ​ប្រជាជាតិ​ផ្សេងទៀត​បាន​ធ្វើតាម​។​ ​ដូច្នេះ​ ​ក៏​មិន​មាន​អ្វី​រារាំង​យើង​ ​នៅពេលដែល​យើង​ជួយ​តៃ​វ៉ាន់​ដែរ​»​។​

​យោង​តាម​សារ​ព័ត៌មាន​ CNA​ ​លោក​ ​E​l​l​wood​ ​ដែល​ជា​សមាជិកសភា​ជាន់ខ្ពស់​មកពី​គណបក្ស​អភិរក្សនិយម​កំពុង​កាន់អំណាច​ ​និង​ជា​អតីត​រដ្ឋមន្ត្រីការពារជាតិ​អង់គ្លេស​ ​បាន​ជួប​ជាមួយ​ប្រធានាធិបតី​តៃ​វ៉ាន់​ ​លោកស្រី​ ​សៃ​ ​អ៊ី​ង​វិ​ន​ (​T​s​a​i​ ​In​g​-​w​e​n), ​រដ្ឋមន្ត្រីការបរទេស​ ​លោក​ យ៉ូ​សែប​ ​វូ​ (Jos​e​p​h​ ​W​u) ​និង​ប្រធាន​ក្រុមប្រឹក្សាសន្តិសុខ​ជាតិ​តៃ​វ៉ាន់​ ​លោក​ វេ​លីង​តុ​ន​ ​គូ​ (​Well​in​g​ton​ Koo) ​កំលុងពេល​ទស្សនកិច្ច​នៅ​ក្រុង​តៃ​ប៉ិ​ ​ដោយ​រូបលោក​បាន​បញ្ជាក់​ថា​ ​លោក​ក៏បាន​ពិភាក្សា​អំពី​កម្មវិធី​នាវាមុជទឹក​តៃ​វ៉ាន់​ផង​ដែរ​ ​ប៉ុន្តែ​លោក​ត្រូវ​ស្វែងយល់​បន្ថែម​អំពី​បញ្ហា​នោះ​បន្តិច​សិន​ ​មុននឹង​បង្ហើប​ជា​សាធារណៈ​៕