ព័ត៌មានអន្តរជាតិ

ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី (Volodymyr Zelenskyy) បានជំរុញឱ្យប្រជាជនរបស់ខ្លួនអត់ធ្មត់ និងរឹងមាំក្នុងការទប់ទល់ជាមួយរដូវរងា ខណៈក្រុមមន្ត្រីកំពុងប្រឹងប្រែងស្ដារឡើងវិញនូវប្រព័ន្ធថាមពល និងសេវាកម្មផ្សេងទៀតដែលត្រូវបានបំផ្លាញដោយការវាយប្រហារតាមអាកាសរបស់រុស្ស៊ី។

ប្រភពរូបភាព៖ TRT World & Yahoo Sports

​ចាប់តាំង​ពីដើម​ខែ​តុលា​មក​ រុស្ស៊ី​បាន​វាយលុក​ហេ​ដ្ឋា​រចនា​ស​ម្ព័ន្ធ​ថាមពល​របស់​អ៊ុយ​ក្រែ​ន​ជាច្រើន​ ​ដោយ​បង្ក​ឱ្យ​មានការ​ដាច់​ភ្លើង​ ​ហើយ​មនុស្ស​រាប់​លាន​នាក់​ត្រូវ​រស់នៅ​ដោយ​គ្មាន​ក​ម្ដៅ ​ចំ​ពេល​សីតុណ្ហភាព​កំពុង​ធ្លាក់ចុះ​ខ្លាំង​។​

​នៅ​ក្នុង​សុន្ទរកថា​កាល​ពីម្សិលមិញ​ ​លោក​ ហ្សេ​ឡេ​ន​ស្គី​ ​បាន​និយាយ​ថា​ ​«​ដើម្បី​ឆ្លងផុត​រដូវរងា​នេះ​ ​ពួកយើង​ត្រូវតែ​មាន​ភាព​អត់ធ្មត់​ ​និង​រួប​រួមគ្នា​ជាង​ពេលណា​ទាំងអស់​»​ ​ហើយ​ ​«​យើង​មិន​អាច​អនុញ្ញាត​ឱ្យ​មាន​ជម្លោះ​ផ្ទៃក្នុង​ ​និង​ការ​ធ្វើ​កូដកម្ម​ណាមួយ​កើតឡើង​ដែល​នាំ​ឱ្យ​យើង​ទាំងអស់គ្នា​ចុះ​ខ្សោយ​នោះ​ទេ​...​»​។​

​បើ​តាម​ការ​លើកឡើង​របស់​អនុរដ្ឋលេខាធិការ​ទទួលបន្ទុក​កិច្ចការនយោបាយ​សហរដ្ឋអាមេរិក​ ​លោកស្រី​ ​Victor​i​a​ Nu​land​ ​បាន​ឱ្យ​ដឹង​ថា​ ​ប្រធានាធិបតី​រុស្ស៊ី ​លោក​ វ្ល៉ា​ឌី​មៀ ​ពូ​ទី​ន​ ​កំពុង​នាំ​ស​ង្រ្គា​ម​ទៅកាន់​ក​ម្រិ​ត​ថ្មី​មួយទៀត​នៃ​ភាព​ព្រៃផ្សៃ​ ​ដោយ​លោក​ព្យាយាម​ផ្តាច់​ថាមពល​របស់​ជនស៊ីវិល​។​

​ទោះជាយ៉ាងណា​ ​ប្រទេស​រុស្ស៊ី​នៅតែ​ប្រកែក​ជា​រឿយ​អំពី​ការវាយប្រហារ​សំដៅ​លើ​ជនស៊ីវិល​ ​ដោយ​បញ្ជាក់​ថា​ ​ខ្លួន​គ្រាន់តែ​មានបំណង​កាត់បន្ថយ​សមត្ថភាព​ប្រយុទ្ធ​របស់​អ៊ុយ​ក្រែ​ន​ ​និង​ជំរុញ​ឱ្យ​មាន​ការចរចា​ប៉ុណ្ណោះ​ ​ទោះបីជា​ក្រុង​គៀ​វ​ ​អះអាង​ថា​ ​ការវាយប្រហារ​បែប​នេះ​ ​គឺជា​ឧក្រិដ្ឋកម្ម​សង្គ្រាម​ក៏ដោយ​។​ ​នេះ​បើ​តាម​សារ​ព័ត៌មាន​ CN​A​៕