ព័ត៌មានជាតិ

​ខណៈ​ដែល​ប្រជាពលរដ្ឋ​ខ្មែរ​មិនថា​ជាប់​សែស្រឡាយ​ចិន​ ​ឬ​ខ្មែរ​នោះ​ទេ​ ​គឺ​ហាក់​ចូលរួម​អប​អរសាទរ​ ​យ៉ាង​ផុស​ផុល​ ​ក្នុង​ឱកាស​បុណ្យចូលឆ្នាំ​ថ្មី​ប្រពៃណី​ចិន​-​វៀតណាម​។​ ​ករណី​នេះ​អ្នកជំនាញ​ប្រវត្តិសាស្ត្រ​ចាត់ទុកថា​គឺ​ការរស់នៅ​ជាមួយគ្នា​ដោយ​ស​ចុះ​សម្រុង​មិនថា​អ្នក​ដែល​មាន​សាសនា​ ​ឬ​ជាតិ​សាស្ត្រ​អ្វី​នោះ​ទេ​ ​តែ​ទោះជាយ៉ាងណា​លោក​ថា​មិន​ត្រូវ​ភ្លេច​អ្វី​ដែល​ខ្មែរ​មាន​ជា​របស់​ខ្លួន​នោះ​ឡើយ​។

​លោក​ ​សំបូរ​ ​ម៉ា​ណា​រ៉ា​ ​សាស្ត្រាចារ្យ​ផ្នែក​ប្រវត្តិសាស្ត្រ​មួយ​រូប​មានប្រសាសន៍ថា​ ​រដ្ឋធម្មនុញ្ញ​នៃ​ព្រះរាជាណាចក្រកម្ពុជា​ ​គឺ​មិន​មាន​ចែង​អំពី​ការរើសអើង​ពូជសាសន៍​ជំនឿ​ ​និង​សាសនា​នោះ​ទេ​ ​ដែល​នេះ​ធ្វើ​ឱ្យ​កម្ពុជា​មាន​គុណសម្បត្តិ​ធំ​ក្នុង​ការ​មាន​ជំនឿ​ ​សាសនា​ ​ដោយ​អាច​បំពេញ​នូវ​អ្វី​ដែល​ជា​កិច្ចការ​តាម​ប្រពៃណី​ដោយសេរី​ ឱ្យ​តែ​មិន​ប៉ះពាល់​អ្នកដទៃ​។​ ​លោក​បន្ត​ថា​នៅ​ជនបទ​ក្តី​ទីក្រុង​ក្តី​ ​ជាពិសេស​តាម​ទីប្រជុំជន​គឺ​មាន​ប្រជាពលរដ្ឋ​រស់នៅ​ច្រើន​ ​ហើយ​ជំនឿ​ ​សាសនា​ ​ប្រពៃណី​ក៏មាន​ច្រើន​លាយឡំ​គ្នា​ ​ជាពិសេស​កូនកាត់​សែស្រឡាយ​ជនជាតិ​ផ្សេងៗ​ច្រើន​ដូចនេះ​ ​ប៉ុន្តែ​នៅ​កម្ពុជា​ហាក់​មានការ​ចុះ​សម្រុង​គ្នា​ក្នុង​ការរស់នៅ​បើ​ទោះ​ជា​មាន​ជំនឿ​ ​ប្រពៃណី​ខុសគ្នា​ក្តី​។​ ​លោក​សាស្ត្រាចារ្យ​បាន​លើក​ឧទាហរណ៍​ថា​ ​មាន​ខ្មែរ​ខ្លះ​សម្បុរ​ខ្មៅ​ ​មិន​មាន​ជាប់​សែស្រឡាយ​ចិន​នោះ​ទេ​ ​ប៉ុន្តែ​ក៏​រៀបចំ​សែន​ចិន​ជាមួយ​គេ​ដែរ​ ​ព្រោះថា​មួក​គេ​ក៏​ចង់​មានការ​ជួបជុំ​សប្បាយ​ ​និង​ចង់​ចូលរួម​អបអរ​ជា​ជាមួយ​អ្នក​ដែល​មាន​សែស្រឡាយ​ចិន​ផង​ដែរ​។​

​យ៉ាងនេះ​ក្តី​ ​លោក​សំបូរ​ ​ម៉ា​ណា​រ៉ា​ ​ដាស់តឿន​ថា​ ​ការចូលរួម​ជាមួយ​ជាតិសាសន៍​ដទៃ​ក៏​មិន​ត្រូវ​ភ្លេច​ប្រវត្តិសាស្ត្រ​ខ្មែរ​ប្រពៃណី​ខ្មែរ​នោះ​ឡើយ​។​ ​ហើយ​ការ​ប្រារព្ធ​ពិធី​ផ្សេងៗ​គឺ​ត្រូវតែ​រក្សា​ឱ្យ​បាន​នូវ​សន្តិសុខ​ ​សុវត្ថិភាព​ ​ដោយ​មិន​ត្រូវធ្វើ​ឱ្យ​ល្មើសច្បាប់​ប្រទេសជាតិ​ផង​ដែរ​៕​