ភ្នំពេញ ថ្ងៃទី២ ខែឧសភា ឆ្នាំ២០២៥ — ក្រុមហ៊ុន ម៉េងលី ជេ. គួច អេឌ្យូខេសិន ម​.ក បានរៀបចំ មហាសន្និបាតភាគហ៊ុនិកសាមញ្ញ លើកទី២ (AGM) របស់ខ្លួន នៅថ្ងៃទី២ ខែឧសភា ឆ្នាំ២០២៥ តាមរយៈកិច្ចប្រជុំហ្សូម ។ កិច្ចប្រជុំនេះធ្វើឡើងក្រោមអធិបតីភាព អ្នកឧកញ៉ា វេជ្ជបណ្ឌិត គួច ម៉េងលី ដែលមានចូលរួមពីសមាជិកក្រុមប្រឹក្សាភិបាល រួមមាន លោក គួច​ ផល លោក គួច អាឡិច និងលោកជំទាវ អ៊ឹង លីហុង ដែលជាអភិបាលប្រតិបត្តិ និង​លោក គង់ វ៉ារ៉ា ដែលជាអភិបាល​ឯករាជ្យ។ កិច្ចប្រជុំនេះក៏មានការចូលរួមពីតំណាងមកពីនិយ័តករមូលបត្រកម្ពុជា (SERC) ផ្សារមូលបត្រកម្ពុជា (CSX) គណៈគ្រប់គ្រងក្រុមហ៊ុន និងភាគហ៊ុនិកសាធារណៈជាច្រើនរូប។

របៀបវារៈសំខាន់ៗនៃមហាសន្និបាតរួមមាន ការតែងតាំងសវនករខាងក្រៅសម្រាប់ឆ្នាំ២០២៥ ដល់ឆ្នាំ២០២៧ ការបោះឆ្នោតជ្រើសរើសអភិបាលឯករាជ្យឡើងវិញ និងការអនុម័តលើការបែងចែកភាគលាភឆ្នាំ២០២៤ ។

ចំណុចសំខាន់ៗនៃរបាយការណ៍ហិរញ្ញវត្ថុ

នៅឆ្នាំ២០២៤ ប្រាក់ចំណូលរបស់ក្រុមហ៊ុនបានកើនឡើងចំនួន ១៤.៥ពាន់លានរៀល កើនឡើង ១០ភាគរយ ធៀបនឹងឆ្នាំមុន។ ប្រាក់ចំណេញដុលក៏បានកើនឡើងចំនួន ៣ពាន់លានរៀលផងដែរ កើនឡើង ៨.៤% ធៀបនឹងឆ្នាំមុន ដែលឆ្លុះបញ្ចាំងពីប្រតិបត្តិការស្នូលដ៏រឹងមាំស្របពេលនឹងការពង្រីកវិសាលភាពជាបន្តបន្ទាប់។

ការពង្រីកខ្លួនជាបន្តបន្ទាប់

យុទ្ធសាស្ត្រដ៏រីកចម្រើនរបស់ក្រុមហ៊ុន ម៉េងលី ជេ. គួច អេឌ្យូខេសិន ម​.ក នៅតែសបញ្ជាក់ឱ្យឃើញតាមរយៈ គម្រោងសាងសង់ពង្រីកសាខានៅឆ្នាំ២០២៤។ ក្រុមហ៊ុនបានសម្ពោធអគារមជ្ឈមណ្ឌលមណ្ឌលភាសា អេ អាយ អាយ (Aii) ថ្មីនៅសាខាជ្រោយចង្វានៅថ្ងៃទី១៩ ខែកក្កដា ឆ្នាំ២០២៤ បន្ទាប់មកសម្ពោធអគារនៃសាលារៀន​ អន្តរទ្វីប អាមេរិកាំង (AIS)​ ​ថ្មី​ នៅសាខាចោមចៅនៅថ្ងៃទី២២ ខែសីហា ឆ្នាំ២០២៤ ។ លើសពីនេះ អគារសិក្សាចំនួន៤សាខាបន្ថែមទៀតត្រូវបានបើកសម្ពោធ និងបើកដំណើរការ នៅសាខាចំការដូងនៅថ្ងៃទី១៦ ខែកញ្ញា ឆ្នាំ២០២៤ និងសាខាទួលសង្កែ នៅថ្ងៃទី ២០ ខែកញ្ញា ឆ្នាំ២០២៤។

ដើម្បីគាំទ្រដល់ការពង្រីករបស់ខ្លួនក្រុមហ៊ុន ម៉េងលី ជេ គួច អេឌ្យូខេសិន ម​.ក បានជួលអចលនទ្រព្យរយៈពេលវែងបន្ថែមជាច្រើនទីតាំង។ ការជួលទាំងនេះរាប់បញ្ចូលទាំងការជួលរយៈពេល២៥ឆ្នាំ សម្រាប់អគារសិក្សាថ្មីបន្ថែមនៅសាខាផ្សារថ្មី ការជួលអចលនទ្រព្យរយៈពេល៣០ឆ្នាំ នៅសាខាចាក់អង្រែ និងការជួលអចលនទ្រព្យរយៈពេល៥០ឆ្នាំ នៅសង្កាត់ស្វាយប៉ាក ខណ្ឌឬស្សីកែវ។ អចលនទ្រព្យទាំងនេះត្រូវបានកំណត់សម្រាប់ការពង្រីកសាខានាពេលអនាគត ដែលបានគ្រោងទុកសម្រាប់ឆ្នាំ២០២៦​ដល់ ឆ្នាំ២០២៧ ។​

សេចក្ដីសម្រេចនៃមហាសន្និបាតភាគហ៊ុនិកសាមញ្ញ លើកទី២

១.      ការជ្រើសតាំងសវនករឯករាជ្យ៖ ភាគហ៊ុនិកបានយល់ព្រមលើការជ្រើសតាំងក្រុមហ៊ុន Ernst & Young (Cambodia) Ltd. ជាសវនករឯករាជ្យរបស់     ក្រុមហ៊ុន ម៉េងលី ជេ. គួច អេឌ្យូខេសិន ម​.ក សម្រាប់ឆ្នាំ២០២៥​ ដល់ឆ្នាំ២០២៧ ដោយមានសំឡេងគាំទ្រ ៩៩.៩៨%។

២.      ការជ្រើសតាំងអភិបាលឯករាជ្យឡើងវិញ៖ ភាគហ៊ុនិកបានយល់ព្រមលើការជ្រើសតាំងលោក គង់ វ៉ារ៉ា ជាអភិបាលឯករាជ្យសម្រាប់អាណត្តិទីពីរ (ថ្ងៃទី១៦  ខែមករា ឆ្នាំ២០២៦ ដល់ថ្ងៃទី១៥ ខែមករា ឆ្នាំ២០២៩) ដោយទទួលបានសំឡេងគាំទ្រ ៩៩.៩៨%។

៣.      ការបែងចែកភាគលាភ៖ ភាគហ៊ុនិកបានអនុម័តលើការបែងចែកភាគលាភដែលបានស្នើឡើង ជាមួយនឹងសម្លេងគាំទ្រ៩៩.៩៨%។ ព័ត៌មានលម្អិតមានដូចខាងក្រោម៖

      ​​      ​​​​​ប្រភេទនៃភាគលាភ៖                   សាច់ប្រាក់

            ប្រភពនៃភាគលាភ៖                    ប្រាក់ចំណេញសុទ្ធនៃឆ្នាំ ២០២៤ និងប្រាក់ចំណេញបង្គរទុក

            ការបែងចែកភាគលាភសរុប៖         ប្រាក់រៀល ១៧,៥៩២,៣២៧,៩១៧​

​​​​                                                            (៤,៣៩៥,៤២៧.២៩ ដុល្លារសហរដ្ឋអាមេរិក)

            ភាគលាភក្នុងមួយហ៊ុន៖                ១៤៥.៦០រៀល (០.០៣៦៣៧ ដុល្លារសហរដ្ឋអាមេរិក) ៥១.៣៩រៀល

                                                           (០.០១២៨៤ ដុល្លារសហរដ្ឋអាមេរិក)សម្រាប់ម្ចាស់ភាគហ៊ុន ១១ នាក់

          សមាមាត្រទូទាត់ភាគលាភ៖        ​  ១៣២.៨៤%

អតីតភាគលាភ ឬអតីតសិទ្ធិ៖          ថ្ងៃទី៩ ខែឧសភា ឆ្នាំ២០២៥

កាលបរិច្ឆេទកត់ត្រាភាគលាភ៖        ថ្ងៃទី១២ ខែឧសភា ឆ្នាំ២០២៥

កាលបរិច្ឆេទទូទាត់ភាគលាភ៖        ថ្ងៃទី២២ ដល់ថ្ងៃទី២៨ ខែឧសភា ឆ្នាំ២០២៥

រូបិយប័ណ្ណទូទាត់ភាគលាភ៖           ដុល្លារអាមេរិក (៤,០០៣រៀល ក្នុង ១ដុល្លារ)

ការទទួលស្គាល់សាជីវកម្ម

ក្រុមហ៊ុន ម៉េងលី ជេ. គួច អេឌ្យូខេសិន ម​.ក មានកិត្តិយសទទួលបានពានរង្វាន់ «ការបង្ហាញព័ត៌មានសាជីវកម្មឆ្នើម ប្រចាំឆ្នាំ២០២៤» ប្រគល់ជូនដោយផ្សារមូលបត្រកម្ពុជា នៅថ្ងៃទី២៥ ខែតុលា ឆ្នាំ២០២៤ ដោយទទួលស្គាល់ការប្តេជ្ញាចិត្តរបស់ក្រុមហ៊ុនចំពោះតម្លាភាព និងទំនាក់ទំនងវិនិយោគិន៕