អ្នកឧកញ៉ា វេជ្ជបណ្ឌិត គួច ម៉េងលី និងក្រុមគ្រួសារ មកស្រុកកំណើតខេត្តកំពង់ឆ្នាំង ជួយពលរដ្ឋក្រីក្រជាង ៤០០ គ្រួសារ
Admin
អ្នកឧកញ៉ា វេជ្ជបណ្ឌិត គួច ម៉េងលី បានសម្ដែងនូវសេចក្ដីរីករាយក្រៃលែង ដែលបានរួមចំណែកក្នុងការជួយដល់ពលរដ្ឋនិងការអភិវឌ្ឍភូមិស្រុកដែលដូនតារបស់លោក ធ្លាប់ឆ្លងកាត់ភាពកម្រត់កម្រ តស៊ូនឹងទុក្ខលំបាកវេទនាកាលពីប៉ុន្មានទសវត្សរ៍មុន។
អ្នកឧកញ៉ា បានបន្តថា ក្រោយពីស្ថានការណ៍កូវីដ ១៩ នៅកម្ពុជាហាក់រាងធូរស្បើយ លោកនិងក្រុមគ្រួសារអាចវិលត្រឡប់មកភូមិស្រុកសារជាថ្មីដើម្បីយកអំណោយចែករំលែកដល់ពលរដ្ឋក្រីក្រ ខណៈរាល់ឆ្នាំមុនៗ លោកតែងតែមកពុំដែលខានឡើយ ពោលគឺចាប់តាំងពីឆ្នាំ ២០០១ មកម្លេះ។
រយៈពេលជាង ២០ ឆ្នាំមកនេះ អ្នកឧកញ៉ាដែលពលរដ្ឋកម្ពុជាជាច្រើនស្គាល់តាមរយៈការផ្តល់ដំបូន្មានដ៏មុតស្រួចទាំងផ្នែកសុខភាពនិងការអប់រំ បានសង្កត់ធ្ងន់ថា មូលនិធិ ម៉េងលី ជេ. គួច របស់លោកបានជួយដល់ ភូមិកង្កែប ឃុំច្រណូក ស្រុកកំពង់លែង ខេត្តកំពង់ឆ្នាំងអស់ប្រមាណជាង ៣០ ម៉ឺនដុល្លារមកហើយ ដោយរាប់ទាំងការឧបត្ថម្ភគ្រឿងឧបភោគបរិភោគដល់ពលរដ្ឋ ពិសេសការរួមចំណែកកសាងវត្តអារ៉ាម សាលារៀន និងអណ្តូងទឹកជាដើម ដើម្បីជួយសម្រួលដល់ការរស់នៅរបស់ពលរដ្ឋ ក៏ដូចជាជម្រុញដល់ការសិក្សារៀនសូត្ររបស់ក្មេងៗនៅក្នុងភូមិផងដែរ។
ទន្ទឹមនឹងនេះដែរ មេភូមិថ្មកង្កែបលោក ឆែម សុខន បានសម្ដែងនូវអារម្មណ៍ត្រេកអរជាខ្លាំង ដែលបានឃើញអ្នកឧកញ៉ា វេជ្ជបណ្ឌិត គួច ម៉េងលី និងក្រុមគ្រួសារ បានចុះមកចែកអំណោយសប្បុរសធម៌ដល់ពលរដ្ឋកំពុងមានជីវភាពខ្វះខាតនៅក្នុងភូមិ។
លោកបន្ថែមថា អ្នកឧកញ៉ា វេជ្ជបណ្ឌិត គួច ម៉េងលី តែងតែចុះមកផ្តល់អំណោយសប្បុរសធម៌និងផ្តល់ជំនួយកសាងវត្តអារ៉ាម សាលារៀន និងអណ្តូងទឹក ជាច្រើនដល់ភូមិ កង្កែប ឃុំច្រណូក ស្រុកកំពង់លែង ខេត្តកំពង់ឆ្នាំង អស់រយៈពេលជាច្រើនឆ្នាំមកហើយ។
បើតាមរបាយការណ៍ដែលទទួលបានពីមូលនិធិ ម៉េងលី ជេ. គួច ចាប់តាំងពីឆ្នាំ ២០០១ ដល់បច្ចុប្បន្ន មូលនិធិ ម៉េងលី ជេ. គួច បានចំណាយទឹកប្រាក់អស់ប្រមាណជាង ៣០ម៉ឺនដុល្លារសហរដ្ឋអាមេរិក ដើម្បីជួយដល់ភូមិកង្កែប ឃុំច្រណូក ស្រុកកំពង់លែង ខេត្តកំពង់ឆ្នាំង ដែលក្នុងនោះសមិទ្ធផលទទួលបានរួមមាន៖ ការស្ថាបនាវត្ដគិរី សេត្ថារាម (ហៅវត្ដថ្មកង្កែប), សាងសង់សាលាបឋមសិក្សាថ្មកង្កែប គួច ប៉េងសាំង ងិន ហួយ, សាងសង់អណ្ដូងទឹក, តទុយោទឹក និងសង់ស៊ីទែន, ការចំណាយសម្រាប់កម្មវិធីចុះជួយសាលាបឋមសិក្សា យុគន្ធរ ស្រុកបរិបូរ ខេត្ដកំពង់ឆ្នាំង, ការចំណាយលើបរិច្ចាគអង្ករ គ្រឿងឧបរិភោគបរិភោគ និងថវិកាជូនប្រជាពលរដ្ឋមួយចំនួន។ ក្រៅពីខេត្តកំពង់ឆ្នាំង នៅមានបណ្តាខេត្តជាច្រើនផ្សេងទៀតទូទាំងប្រទេស ដែលមូលនិធិ ម៉េងលី ជេ. គួច បានចូលរួមក្នុងសកម្មភាពមនុស្សធម៌ ដែលគិតជាទឹកប្រាក់ប្រហែលខ្ទង់លានដុល្លារទៅហើយ។
មូលនិធិ ម៉េងលី ជេ. គួច ត្រូវបានបង្កើតឡើងក្នុងឆ្នាំ ២០០៥ ដែលជាអង្គការក្រៅរដ្ឋាភិបាលមួយដែលមានមូលដ្ឋាននៅរាជធានីភ្នំពេញ។ មូលនិធិនេះត្រូវបានផ្តួចផ្តើមឡើងក្រោមគំនិតផ្ដូចផ្ដើមរបស់អ្នកឧកញ៉ា វេជ្ជបណ្ឌិត គួច ម៉េងលី សម្រាប់គោលបំណងសប្បុរសធម៌ ចំណេះដឹងអក្ខរកម្ម និងគោលបំណងស្រាវជ្រាវ៕
