ដើមឆ្នាំ២០២៣ ប្រជាពលរដ្ឋទូទៅហាក់ចាប់អារម្មណ៍លើវិស័យមូលបត្រច្រើន
Admin
លោកស្រី គឹម សុផានីតា ប្រធាននាយកដ្ឋានប្រតិបត្តិការទីផ្សារ នៃផ្សារមូលបត្រកម្ពុជាបានប្រាប់ MJQTV ថា កម្រិតយល់ដឹងពីវិស័យមូលបត្ររបស់ប្រជាពលរដ្ឋទូទៅគឺនៅទាប ប៉ុន្តែប្រជាពលរដ្ឋដែលរស់នៅក្នុងតំបន់ទីប្រជុំជន ជាពិសេសប្រជាពលរដ្ឋក្នុងវ័យកណ្ដាលគឺចាប់ផ្ដើមយល់ដឹងជាបណ្ដើរៗ បើទោះជាគាត់មិនទាន់យល់ច្បាស់ពីអ្វីទៅជាផ្សារមូលបត្រ ប៉ុន្តែយ៉ាងហោចណាស់គាត់បានស្គាល់ពីផ្សារហ៊ុនឬភាគហ៊ុននេះ។ អ្នកស្រីបន្ថែមថា ក្នុងរយៈពេល២ទៅ៣ឆ្នាំចុងក្រោយនេះ គឺប្រជាពលរដ្ឋបានចាប់អារម្មណ៍និងតាមដានអំពីវស័យមួយនេះ។
បើតាមលោកស្រី គឹម សុផានីតា រហូតមកដល់ពេលនេះមានអ្នកបើកគណនីសម្រាប់ជួញដូរក្នុងវិស័យមូលបត្រប្រមាណ ៣ ៥០០០គណនី ដែលចំនួននេះគឺនៅតិចបើធៀបជាមួយចំនួនប្រជាពលរដ្ឋនៅក្នុងប្រទេសកម្ពុជា ប៉ុន្តែបើធៀបជាមួយចំនួនអ្នកដែលមកបើកគណនីកាលពី២ទៅ៣ឆ្នាំមុនគឺមានអត្រាខ្ពស់ជាងឆ្ងាយ ខណៈដែលប្រជាពលរដ្ឋមួយចំនួនកំពុងតែស្វែងយល់ព័ត៌មានអំពីវិស័យមូលបត្រនេះ តាមរយៈបណ្ដាញសង្គម និងចូលរួមផ្ទាល់តាមរយៈសិក្ខាសានានាដែលរៀបចំទាក់ទងនឹងវិស័យមូលបត្រ។
អ្នកស្រីឱ្យដឹងទៀតថា ស្របពេលដែលប្រជាពលរដ្ឋបានបង្កើតគណនីដើម្បីជួយដូរក្នុងវិស័យមូលបត្រនេះក៏មានផងដែរអ្នកដែលបានចូលទិញ-លក់ភាគហ៊ុនក្នុងវិស័យមួយនេះ ដែលភាគច្រើនគឺប្រជាពលរដ្ឋក្នុងវ័យកណ្ដាល និងយុវជន ។
បច្ចុប្បន្នគឺមានក្រុមហ៊ុនចំនួន៩ហើយដែលបានចុះបញ្ជីលក់ជាភាគហ៊ុន ក្នុងនោះមាន៧ក្រុមហ៊ុនចុះបញ្ជីក្នុងទីផ្សារគោល និងក្រុមហ៊ុន២ទៀតគឺបានចុះបញ្ជីក្នុងប្រភេទទីផ្សារកំណើន៕
