ប្រភពរូបភាព៖ BBC
យោងតាមសារព័ត៌មាន BBC កិច្ចប្រជុំកំពុងពិភាក្សាគ្នាអំពីចលនាគាំទ្ររបស់អ៊ុយក្រែន និងសម្ព័ន្ធមិត្តរបស់ខ្លួន ដែលទាមទារឱ្យរុស្ស៊ីដកខ្លួនចេញជាបន្ទាន់ និងដោយគ្មានលក្ខខណ្ឌ ហើយអ៊ុយក្រែនសង្ឃឹមថា តាមរយៈការគាំទ្ររបស់បណ្តាប្រទេសនានា វានឹងបង្ហាញពីសាមគ្គីភាព។
នៅក្នុងមហាសន្និបាត លោក Guterres បានលើកឡើងយ៉ាងដូច្នេះ «ការឈ្លានពាននោះ គឺជាការគំរាមកំហែងដល់សតិសម្បជញ្ញៈរបស់យើង។ វាគឺជាការរំលោភលើធម្មនុញ្ញរបស់អង្គការសហប្រជាជាតិ និងច្បាប់អន្តរជាតិ» ហើយផលវិបាកដែលអាចកើតមាន គឺជាគ្រោះថ្នាក់សម្រាប់ពេលបច្ចុប្បន្ន។
បើតាមប្រមុខអង្គការសហប្រជាជាតិរូបនេះ សង្រ្គាមកំពុងជំរុញអស្ថិរភាពក្នុងតំបន់ និងជំរុញឱ្យមានភាពតានតឹង រួមទាំងការបែកបាក់ជាសកល ខណៈការគំរាមកំហែងដោយចេតនាក្នុងការប្រើអាវុធនុយក្លេអ៊ែរ ក៏ត្រូវបានលើកឡើងផងដែរ។
លោកបានបន្តថា «វាជាពេលវេលាដ៏សំខាន់ក្នុងការដើរចេញពីមាត់ជ្រោះ។ ភាពសុខស្រួល នឹងធ្វើឱ្យវិបត្តិកាន់តែស៊ីជម្រៅ» ហើយ «សង្គ្រាមមិនមែនជាដំណោះស្រាយនោះទេ។ សង្គ្រាមគឺជាបញ្ហា។ ប្រជាជននៅអ៊ុយក្រែនកំពុងរងទុក្ខយ៉ាងខ្លាំង។ អ៊ុយក្រែន រុស្ស៊ី និងប្រជាជន ត្រូវការសន្តិភាព»។
នៅក្នុងមហាសន្និបាត ប្រទេសចំនួន៦០ បានចូលរួមរកដំណោះស្រាយដែលសង្កត់ធ្ងន់លើ «តម្រូវការដើម្បីឈានដល់ទៅរកសន្តិភាពដ៏ទូលំទូលាយ យុត្តិធម៌ និងយូរអង្វែងនៅក្នុងអ៊ុយក្រែនឱ្យបានឆាប់តាមដែលអាចធ្វើទៅបាន ស្របតាមគោលការណ៍នៃធម្មនុញ្ញអង្គការសហប្រជាជាតិ»។
ចាប់តាំងពីការចាប់ផ្តើមនៃសង្រ្គាមរុស្ស៊ី-អ៊ុយក្រែន ជនស៊ីវិលយ៉ាងហោចណាស់៧ ១៩៩នាក់ ត្រូវបានរាយការណ៍ថា បានស្លាប់ និងរាប់ពាន់នាក់ផ្សេងទៀតបានរងរបួស ខណៈទាហានរបស់ពួកគេយ៉ាងហោចណាស់១០០ ០០០នាក់បានស្លាប់ ឬរងរបួស។ មិនតែប៉ុណ្ណោះ មនុស្សជាង១៣លាននាក់ ក៏ត្រូវបង្ខំចិត្តភៀសខ្លួនទៅបរទេស ឬផ្លាស់ទីលំនៅក្នុងប្រទេសអ៊ុយក្រែនផងដែរ។ នេះយោងតាមការប៉ាន់ប្រមាណរបស់អង្គការសហប្រជាជាតិ៕