.png){kind=logo}
_Khmer_(2).jpg)
ក្រុមហ៊ុន MJQ Media Network (MMN) របស់អ្នកឧកញ៉ា វេជ្ជបណ្ឌិត គួច ម៉េងលី បានបើកសម្ពោធជាផ្លូវការនៅថ្ងៃទី ៣០ ខែមេសា ឆ្នាំ ២០២២ នេះ ដោយមានវត្តមានភ្ញៀវកិត្តិយសចូលរួមជាច្រើនរយនាក់។
ខណៈចូលរួមជាអធីបតីភាពក្នុងពិធីសម្ពោធក្រុមហ៊ុន MMN អ្នកឧកញ៉ា វេជ្ជបណ្ឌិត គួច ម៉េងលី ដែលជាស្ថាបនិក ប្រធានក្រុមប្រឹក្សាភិបាល និងជាអគ្គនាយកប្រតិបត្តិនៃ MJQ Education និងជាស្ថាបនិកប្រធានក្រុមប្រឹក្សាភិបាល និងចាងហ្វាងនៃ MJQ Media Network បានថ្លែងថា លោកពិតជាមានសេចក្តីសោមនស្សជាខ្លាំង ដែលក្រុមហ៊ុនបណ្តាញព័ត៌មានថ្មីរបស់លោកបានបើកសម្ពោធនៅថ្ងៃនេះ ពិសេសមានភ្ញៀវកិត្តិយសនិងមិត្តអ្នកសារព័ត៌មានពីបណ្តាអង្គភាពជាច្រើនបានចូលរួមនៅថ្ងៃសម្ពោធដ៏មហោឡារិកនេះ។
អ្នកឧកញ៉ាបានសង្កត់ធ្ងន់ថា ក្រុមហ៊ុន MMN ប្រមូលផ្តុំសុទ្ធតែបុគ្គលិកជំនាញនិងមានទេព្យកោសល្យក្នុងវិស័យតែងនិពន្ធនិងព័ត៌មានជាច្រើនឆ្នាំ។ ក្រុមហ៊ុននេះ មានចក្ខុវិស័យវែងឆ្ងាយក្នុងការរួមចំណែកជាច្រើនក្នុងការជួយជំរុញឱ្យវិស័យអប់រំ និងវប្បធម៌ខ្មែរកាន់តែរីកចម្រើនឡើង។ លោកបន្ថែមថា បច្ចុប្បន្នអ្នកសារពត័មានមួយចំនួននៅកម្ពុជា ពុំមានវិជ្ជាជីវៈត្រឹមត្រូវហើយខ្លះទៀតពុំបានប្រើចំណេះជំនាញវិជ្ជាជីវៈរបស់ខ្លួនឱ្យត្រូវតាមគោលដៅក្នុងវិស័យសារព័ត៌មាននោះទេ ដែលធ្វើឱ្យតម្លៃនៃអ្នកសារព័ត៌មានមិនសូវជាមានការឱ្យតម្លៃខ្ពស់។
មូលហេតុដែលអ្នកឧកញ៉ាបង្កើតក្រុមហ៊ុន MMN នេះឡើង ដោយសារលោកចង់ឱ្យស្ថាប័នរបស់លោក ក្លាយជាប្រភពផ្តល់ចំណេះដឹងដ៏មានសក្តានុពលនិងទំនុកចិត្តសម្រាប់ពលរដ្ឋកម្ពុជាឱ្យទទួលបានព័ត៌មានប្រកបដោយចំណេះដឹងនិងគុណភាពតាមវិជ្ជាជីវៈ ដើម្បីជំរុញដល់ការរស់នៅនិងការប្រកបអាជីវកម្មឱ្យកាន់តែល្អប្រសើរឡើង។
ទន្ទឹមនឹងនេះដែរ លោក នេត ចំរើន ដែលជាអ្នកគ្រប់គ្រងទូទៅនៃក្រុមហ៊ុន MMN បានឱ្យដឹងថាក្រុមហ៊ុន MMN នឹងពុះពារនិងប្តេជ្ញាចិត្តយ៉ាងមុតមាំក្នុងការកសាងស្ថាប័នព័ត៌មានមួយនេះឱ្យកាន់តែមានភាពល្បីល្បាញ ពិសេសជាចំណែកមួយក្នុងការលើកស្ទួយវិស័យសារព័ត៌មាននៅកម្ពុជាប្រកបដោយវិជ្ជាជីវៈត្រឹមត្រូវក្នុងការកសាងសង្គមជាតិឱ្យកាន់តែរឹងមាំ។
លើសពីនេះ លោកបានបន្ថែមថា MMN អាចមានថ្ងៃនេះ ដោយសារមានការជួយតម្រង់ទិសពីអ្នកឧកញ៉ា វេជ្ជបណ្ឌិត គួច ម៉េងលី ក៏ដូចជាទទួលបានការជួយជ្រោមជ្រែងពីសំណាក់ លោកនាយក ចាងហ្វាង ប្រធានផ្នែក និងលោកគ្រូអ្នកគ្រូកន្លងមក ដែលនៅទីបំផុត MMN ក៏អាចបើកសម្ពោធជាផ្លូវការនៅថ្ងៃទី ៣០ មេសា ឆ្នាំ ២០២២ ក្រោមការចូលរួមពីភ្ញៀវកិត្តិយសនិងអ្នកសារព័ត៌មានជាច្រើនរយនាក់។
ក្រុមហ៊ុន MMN មានបុត្រសម្ពន្ធទាំងអស់ចំនួន ៧ ដែលជាបណ្ដាញផ្សព្វផ្សាយឌីជីថលដ៏សម្បូរបែបរួមមាន៖ MJQTV ជាបណ្តាញទូរទស្សន៍អនឡាញ ផលិតកម្មវិធីជាច្រើនដូចជា ចក្ចុវិស័យ គួច ម៉េងលី, កញ្ចក់សេដ្ឋកិច្ច, ជីវិតខ្ញុំ, ទំព័រសៀវភៅ និងគ្រោងផលិតកម្មវិធីជាច្រើនទៀតសម្រាប់បម្រើជាចំណីអារម្មណ៍ថ្មីដល់ទស្សនិកជន។
គេហទំព័រសារព័ត៌មាន The Intercon Rooster (TIR) ផ្តោតសំខាន់លើការផ្សព្វផ្សាយព័ត៌មានជាតិ អន្តរជាតិ សេដ្ឋកិច្ច គន្លឹះអាជីវកម្ម វប្បធម៌ ប្រវត្តិសាស្រ្ត សុខភាព អប់រំ កម្សាន្ត បទយកការណ៍ចម្រុះនិងព័ត៌មានភ្លាមៗនៅតាមបណ្ដាលខេត្ដទូទាំងប្រទេស។
ក្រៅពីស្ថាប័នជាឆ្អឹងខ្នងពីរខាងលើ គ្រឹះស្ថានបោះពុម្ពនៃសាកលវិទ្យាល័យ ម៉េងលី ជេ. គួច ហៅកាត់ថា MJQUP បានដើរតួនាទីសំខាន់ក្នុងការបោះពុម្ពផ្សាយសៀវភៅប្រកបដោយគុណភាព។ គ្រឹះស្ថានបោះពុម្ពនេះ ផ្តោតសំខាន់លើការស្រាវជ្រាវ ប្រមូលចងក្រងនូវទស្សនៈ មតិយោបល់ល្អៗរបស់អ្នកឧកញ៉ា វេជ្ជបណ្ឌិត គួច ម៉េងលី ក្នុងន័យលើកទឹកចិត្ត និងអប់រំដល់យុវជនជំនាន់ក្រោយដែលចង់ចេះចង់ដឹងពីការធ្វើអាជីវកម្ម ការសិក្សា និងការថែទាំសុខភាព។
បន្ថែមពីលើបុត្រសម្ពន្ធទាំងបី ដែលបានដំណើរការដោយមានភាពល្បីល្បាញ MMN ក៏បានពង្រីកសក្តានុពលខ្លួន ដោយបានបង្កើតបុត្រសម្ពន្ធ ៤បន្ថែមទៀតរួមមាន៖ Family Health ជាបណ្តាញផ្សព្វផ្សាយឌីជីថល ស្តីពីចំណេះដឹងសុខភាព, EnterFashion ជាបណ្តាញផ្សព្វផ្សាយស្តីពីភាពទំនើបនិយម ក្នុងការរស់នៅនាសម័យទំនើប, Education Chronicle ប្រមូលផ្តុំទៅដោយអត្ថបទនិងគំនិតអប់រំសម្រាប់ពលរដ្ឋគ្រប់វ័យ និងចុងក្រោយ Business Update ជាបណ្តាញផ្សព្វផ្សាយស្តីពីគន្លឹះអាជីវកម្ម ទស្សនអាជីវកម្ម និងរបកគំហើញថ្មីៗ ស្តីពីជំនួញ ភាពជោគជ័យ និងភាពបរាជ័យ ដែលជាមេរៀនក្នុងការប្រកបអាជីវកម្ម៕
រូបភាព៖ អឿ ស៊ីណា
_Khmer_(2).jpg)
1-01.jpg)