មជ្ឈមណ្ឌលភាសា អេ អាយ អាយ (Aii) ដែលជាមជ្ឈមណ្ឌលបណ្ដុះបណ្ដាលលើមុខជំនាញភាសាបរទេស នៅថ្ងៃទី១៩ ខែកក្កដា ឆ្នាំ២០២៤ បានប្រារព្ធពិធីដាក់សម្ពោធឱ្យប្រើប្រាស់ជាផ្លូវការនូវអគារសិក្សាថ្មីបន្ថែមកម្ពស់៩ជាន់ នៅសាខាជ្រោយចង្វារ រាជធានីភ្នំពេញ។

ពិធីសម្ពោធដាក់ឱ្យប្រើប្រាស់អគារសិក្សាថ្មីរបស់មជ្ឈមណ្ឌលភាសា អេ អាយ អាយ (Aii) នេះ ធ្វើឡើងក្រោមអធិបតីភាពរបស់អ្នកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន ម.ក និងលោកជំទាវ អ៊ឹង លីហុង ព្រមទាំងមានវត្តមានចូលរួមពីថ្នាក់ដឹកនាំ បុគ្គលិក លោកគ្រូ អ្នកគ្រូ នៃក្រុមហ៊ុន ម៉េងលី ជេ. គួច អេឌ្យូខេសិន ម.ក ក៏ដូចជាមាតាបិតា សិស្សានុសិស្ស ភ្ញៀវកិត្តិយស និងអ្នកសារព័ត៌មានជាតិ និងអន្តរជាតិជាច្រើនរូប។

តាមរយៈការផ្ដល់បទសម្ភាសជូនក្រុមអ្នកសារព័ត៌មាននៅបន្ទាប់ពីពិធីកាត់ខ្សែបូ អ្នកឧកញ៉ា វេជ្ជបណ្ឌិត គួច ម៉េងលី បានបង្ហាញសេចក្ដីសោមនស្សរីករាយយ៉ាងខ្លាំង ដែលក្រុមហ៊ុនម៉េង លី ជេ. គួច អេឌ្យូខេសិន បានប្រកាសសម្ពោធដាក់ឱ្យប្រើប្រាស់អគារសិក្សាថ្មីរបស់មជ្ឈមណ្ឌលភាសា អេ អាយ អាយ (Aii) ដ៏ធំស្កឹមស្កៃថ្មីនេះ និងបានប្រកាសស្វាគមន៍សិស្សានុសិស្សថ្មីៗ ដើម្បីមកចុះឈ្មោះចូលរៀននៅមជ្ឈមណ្ឌលភាសា អេ អាយ អាយ (Aii)។

ជាមួយគ្នា អ្នកឧកញ៉ា វេជ្ជបណ្ឌិត គួច ម៉េងលី បានថ្លែងបញ្ជាក់ថា៖ «ការដាក់សម្ពោធឱ្យប្រើប្រាស់អគារសិក្សាថ្មីនេះ គឺដោយសារបច្ចុប្បន្ននេះ កំណើនសិស្សានុសិស្សកើនឡើងកាន់តែច្រើនឡើង នៅមជ្ឈមណ្ឌលភាសា អេ អាយ អាយ (Aii) សាខាជ្រោយចង្វារ ដែលជាស្ថាប័នអប់រំប្រកបដោយគុណភាពឈានមុខគេមួយនៅក្នុងប្រទេសកម្ពុជា។»

បន្ថែមពីនេះ អ្នកឧកញ៉ា វេជ្ជបណ្ឌិត គួច ម៉េងលី បានលើកឡើងថា៖ «ការដាក់សម្ពោធអគារសិក្សាថ្មីនេះ បង្ហាញអំពីសក្ដានុពលរបស់មជ្ឈមណ្ឌលភាសា អេ អាយ អាយ (Aii) នៅលើវិស័យអប់រំរបស់កម្ពុជា ជាពិសេស អ្នកអាណាព្យាបាល និងមាតាបិតារបស់សិស្សានុសិស្សមានទំនុកចិត្តលើសេវាអប់រំរបស់ក្រុមហ៊ុន ម៉េងលី ជេ. គួច អេឌ្យូខេសិន ម.ក។»

លោក ផូ សុផេន នាយក មជ្ឈមណ្ឌលភាសា អេ អាយ អាយ (Aii) សាខាជ្រោយចង្វារ មានប្រសាសន៍ថា៖ «យើងមានសេចក្តីរំភើបរីករាយក្នុងការដាក់សម្ពោធដំណើរការអគារសិក្សាថ្មីរបស់យើង ដែលនឹងអាចឱ្យយើងបំពេញតម្រូវការនៃការអប់រំភាសាប្រកបដោយគុណភាពជូនសហគមន៍ជ្រោយចង្វារ។ ការសម្ពោធអគារសិក្សាថ្មីនេះ គឺជាសក្ខីភាពមួយនៃចក្ខុវិស័យរបស់មជ្ឈមណ្ឌលភាសា អេ អាយ អាយ (Aii) ក្នុងការផ្តល់ការអប់រំ និងចូលរួមដល់ការអភិវឌ្ឍជំនាញភាសានៅកម្ពុជា។

សូមជម្រាបថា អគារសិក្សាថ្មីរបស់មជ្ឈមណ្ឌលភាសា អេ អាយ អាយ (Aii) សាខាជ្រោយចង្វារនេះមានកម្ពស់សរុបចំនួន៩ជាន់ មានប្រមាណជាង៦០បន្ទប់ និងអាចផ្ទុកសិស្សបានរហូតដល់ទៅប្រមាណជាង ១,៥០០នាក់។ មជ្ឈមណ្ឌលភាសា អេ អាយ អាយ (Aii) សាខាជ្រោយចង្វារ ផ្តល់ជូននូវកម្មវិធីភាសាអង់គ្លេស ចិន និងភាសាថៃ ក៏ដូចជាវគ្គត្រៀមប្រលងថហ្វល TOEFL សម្រាប់អ្នកសិក្សាគ្រប់វ័យ។ អគារថ្មីនេះ មានទីតាំងនៅផ្ទះលេខ EX136 ផ្លូវជាតិលេខ៦អា (6A) ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ហើយនឹងអាចស្វាគមន៍សិស្សានុសិស្សបន្ថែមឱ្យចូលរៀនកាន់តែច្រើនឡើង និងលើកកម្ពស់បទពិសោធសិក្សាបន្ថែមទៀត។ សម្រាប់អគារសិក្សាថ្មីបន្ថែមនេះនឹងប្រើប្រាស់សម្រាប់សិស្សានុសិស្សក្នុងកម្មវិធី Pre-kid Program និង Kid-Program៕

អត្ថបទដោយ៖ យឺន សីហា