ខេត្តបាត់ដំបងស្ថិតនៅកំពូលតារាង មានភ្ញៀវទេសចរដើរលេងកម្សាន្តច្រើនជាងគេពេលចូលឆ្នាំខ្មែរ
Admin
បើតាមរបាយការណ៍របស់ក្រសួងទេសចរណ៍ ភ្ញៀវទេសចរដែលចូលមកដើរលេងកម្សាន្តនៅខេត្តបាត់ដំបងក្នុងឱកាសបុណ្យចូលឆ្នាំខ្មែរពីថ្ងៃទី ១៤- ១៦ មេសា និងថ្ងៃអាទិត្យទី ១៧ មេសា មានចំនួនសរុប ៦៥៣ ៨៩៦ នាក់ ហើយបន្តបន្ទាប់មាន ខេត្តកំពង់ចាម ៥៤១ ៩០០ នាក់ ខេត្តបន្ទាយមានជ័យ ៤៧១ ១១៩ នាក់ ខេត្តសៀមរាប ៤៥៥ ៩៨៤ នាក់ ខេត្តព្រៃវែង ៣៩៦ ៣២៨ នាក់ ខេត្តកំពង់ស្ពឺ ៣៤៥ ០១៨ នាក់ ខេត្តពោធិ៍សាត់ ៣៣៨ ៩១៦ នាក់ ខេត្តកំពង់ឆ្នាំង ៣០០ ៥៦១ នាក់ ខេត្តកំពត ២៨៤ ៨៩៣ នាក់ ខេត្តព្រះសីហនុ ២៦៤ ៣០៨ នាក់ និងរាជធានីភ្នំពេញមានចំនួន ២៤០ ៤៦០ នាក់។ លោកថា ចំនួនភ្ញៀវទេសចរទាំងអស់ ជាការរាប់ចំនួនដងនៃភ្ញៀវម្នាក់ដែលបានដើរលេងតាមទីកន្លែងកម្សាន្តផ្សេងៗគ្នា។
លោក អ៊ុច អ៊ុំភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង បានប្រាប់ក្រុមការងារ MJQTV តាមទូរសព្ទថា ឆ្នាំនេះខេត្តបាត់ដំបងទាំងមូលដោយមានលោក សុខ លូ ជាអភិបាល បានត្រៀមខ្លួននិងរៀបចំសណ្តាប់ធ្នាប់ កន្លែងកម្សាន្ត និងហេដ្ឋារចនាសម្ព័ន្ធសាធារណៈគ្រប់ទីកន្លែងបានយ៉ាងល្អ ដើម្បីទទួលភ្ញៀវទេសចរពីគ្រប់ទិសទីទូទាំងប្រទេសមកដើរលេងកម្សាន្ត។
មន្រ្តីដដែលបានអះអាងថា ស្រុកចំនួន ៤ នៃខេត្តបាត់ដំបងមាន ស្រុកបាណន់ សំឡូត រតនមណ្ឌល និងស្រុកឯកភ្នំ បានទាក់ទាញភ្ញៀវមកលេងយ៉ាងណែនណាន់តាន់តាប់នាឱកាសបុណ្យចូលឆ្នាំខ្មែរ ព្រោះតំបន់ទាំងនេះមានសក្តានុពលខាងវិស័យទេសចណ៍ដោយសម្បូរទៅដោយ ផ្ទះបុរាណ ទឹកធ្លាក់ ណូវី សួនផ្កាស្រស់ស្អាត និងចម្ការដំណាំចម្រុះជាច្រើនកន្លែងថែមទៀតផង។
ពាក់ព័ន្ធនឹងរឿងលំហូរភ្ញៀវទេសចរ លោក អ៊ុំភីនីស្សារ៉ា បានពន្យល់ថា តាមពិតទៅភ្ញៀវមកលេងខេត្តបាត់ដំបងក៏បានហូរពីខេត្តសៀមរាបមកដែរ ហើយភ្ញៀវទេសចរភាគច្រើនចូលចិត្តមកដើរលេងតាមតំបន់រមណីយដ្ឋាននានាតាមទីជន់បទក្នុងខេត្តបាត់ដំបងនៅពេលថ្ងៃ ហើយមកប្រមូលផ្តុំគ្នាយ៉ាងច្រើននៅក្នុងក្រុងពេលរាត្រី ដើម្បីលេងបាញ់ទឹកនិងមើលតន្រ្តីជាដើម។
ប្រធានមន្ទីរទេសចរណ៍ខេត្តបាត់ដំបង បានបញ្ជាក់ជាចុងក្រោយថា សមិទ្ធផលដែលខេត្តបាត់ដំបងទទួលបានមកនេះ ដោយសាររដ្ឋាភិបាលកម្ពុជាបានសម្រេចបើកប្រទេសទាំងមូល ពិសេសបើកដំណើរការវិស័យទេសចរណ៍ឡើងវិញនៅឆ្នាំ ២០២២ ហើយតាមបណ្តាខេត្តទូទាំងប្រទេសក៏រួមគ្នារៀបចំបានយ៉ាងល្អក្នុងបរិបទកូវីដ ទើបភ្ញៀវទេសចរជាតិនិងអន្តរជាតិមានទំនុកចិត្តក្នុងការដើរលេងកម្សាន្តយ៉ាងច្រើនដូច្នេះ ដែលជាសញ្ញាវិជ្ជមានក្នុងការងើបឡើងវិញនៃវិស័យទេសចរណ៍៕
រូបភាព៖ រដ្ឋបាលខេត្តបាត់ដំបង
.jpg)
