ព្រះរាជបណ្ណាល័យហ្លួងម៉ែ ជាបណ្ណាល័យមួយក្នុងចំណោមបណ្ណាល័យ​​ជាច្រើននៅក្នុងប្រទេសកម្ពុជា​​​ដែលត្រូវបានសាធារណៈជនទទួល​ដឹងថា ជាប្រភពឯកសារដ៏សម្បូរបែបដោយបាន​ប្រមូលផ្តុំ​សៀវភៅ និងឯកសារប្រវត្តិសាស្ត្រ​សំខាន់ៗ​ស្តីពីព្រះរាជកិច្ច តស៊ូដើម្បីជាតិមាតុភូមិរបស់ព្រះមហាក្សត្រខ្មែរ និងឯកសារស្រាវជ្រាវស្តីអំពីរបបកម្ពុជាប្រជាធិបតេយ្យជាដើម។

ដោយមើលអំពីឃើញពីគុណតម្លៃបែបនេះហើយ ទើបនៅព្រឹកថ្ងៃទី០​៥ ខែមីនា ឆ្នាំ២០២៥ ក្រុមការងារបណ្ណសារ​ដ្ឋាន នៃក្រុមហ៊ុន ម៉េងលី ជេ. គួច អេឌ្យូខេសិន ម.ក​ ដែលជាផ្នែកមួយ​ស្ថិតក្រោមផ្នែករដ្ឋបាល​ ព្រមទាំង​ក្រុមការងារផ្នែកប្រវត្តិសាស្ត្រ​ ម៉េងលី ជេ. គួច​ បានធ្វើដំណើរទៅទស្សនកិច្ចសិក្សា​នៅព្រះរាជបណ្ណាល័យហ្លួងម៉ែ និងមជ្ឈមណ្ឌលឯកសារកម្ពុជា​ ក្នុងគោលបំណង​ស្វែងយល់បន្ថែមអំពីបច្ចេកទេស និងចំណេះដឹង​ផ្សេងៗ ​នៃការរៀបចំទុកដាក់ឯកសារប្រកបដោយ​សុវត្ថិភាពត្រឹមត្រូវ​​ និងការរៀបចំទុកដាក់ឯកសារតាមបែបឌីជីថល។

ក្រោមស្នាមញញឹមទទួលស្វាគមន៍​ប្រកបដោយភាព​រួសរាយរាក់ទាក់​ និងពេញដោយ​ភាពកក់ក្ដៅបំផុត​​​ លោក​ រស់ សំពៅ អ្នកគ្រប់គ្រងព្រះរាជបណ្ណាល័យហ្លួងម៉ែ បានឱ្យដឹងថា ព្រះរាជបណ្ណាល័យហ្លួងម៉ែ ត្រូវបានបង្កើតឡើងដោយមជ្ឈមណ្ឌលឯកសារកម្ពុជា​ ក្នុងគោលបំណងថ្វាយព្រះកិត្តិយសជាទីគោរពដ៏ខ្ពង់ខ្ពស់បំផុតថ្វាយសម្តេចព្រះមហាក្សត្រី នរោត្តម មុនិនាថ សីហនុ ដែលទ្រង់បានខិតខំប្រឹងប្រែង ក្នុងបុព្វហេតុប្រទេសជាតិ និងប្រជាជនខ្មែរ។ ព្រះរាជបណ្ណាល័យមួយនេះ​ ត្រូវបាន​សម្ពោធដាក់ឱ្យដំណើរការ កាលពីថ្ងៃទី២១ ខែកញ្ញា ឆ្នាំ​២០២០ កន្លងទៅ។ លោកបន្ដថា នៅក្នុងព្រះរាជបណ្ណាល័យហ្លួងម៉ែ មាន​ប្រភេទឯកសារចំនួន​៥​ ដូចជា ឯកសារជាក្រដាស ឯកសារភ័ស្ដុតាងដែលបានសម្ភាសន៍ផ្ទាល់ពីប្រភព​ ឯកសារខ្សែអាត់សំឡេង ឯកសាររូបថត និងភាពយន្តឯកសារ​។

លោកបន្ថែមថា​ ព្រះរាជបណ្ណាល័យនេះ មានតម្កល់សមុច្ឆ័យប្រមាណ៣០០០ក្បាល និងឯកសារចំនួនជាង២៨០០ប្រអប់​ដែលទទួលបានពីលោ​កឯកអគ្គរាជទូតបណ្ឌិត ហូលីយ៉ូ អេ. ជែលដ្រេស ក្នុងឆ្នាំ២០១៩​​ និងឯកសារប្រវត្តិសាស្ត្រ​ស្តីអំពីរបបកម្ពុជាប្រជាធិបតេយ្យ​ឆ្នាំ១៩៧៥​ ដល់ឆ្នាំ១៩៧៩ ព្រមទាំងឯកសារប្រវត្ដិសាស្រ្ដផ្សេងៗទៀត​យ៉ាងហោចណាស់ជិត២លាន​ទំព័រ (បានផ្ដល់ជូនតុលាការ សាលាក្ដីខ្មែរក្រហម) ​​ដែលក្រុមការងារបស់មជ្ឈមណ្ឌលឯកសារកម្ពុជា បានធ្វើការស្រាវជ្រាវអស់រយៈពេល​ជិត៣០ឆ្នាំកន្លងមកនេះ។

អ្នកគ្រប់គ្រងព្រះរាជបណ្ណាល័យហ្លួងម៉ែ លោក រស់ សំពៅ បានសង្កត់ធ្ងន់ថា ព្រះរាជបណ្ណាល័យហ្លួងម៉ែ ​គឺមានតម្កល់នូវរូបថត ភាពយន្ត និងខ្សែអាត់សម្លេងជាច្រើនម៉ឺនសម្លេងរបស់ជនរងគ្រោះក្នុង​​របបខ្មែរក្រហម​ដើម្បីអភិរក្ស​ ថែរក្សាឯកសារទាំងនេះឱ្យបានគង់វង្ស និងបន្សល់ទុកសម្រាប់ប្រជាជនខ្មែរ។ លោកបន្ថែមទៀតថា ឯកសារទាំងនេះ​ ត្រូវបានបង្កើត​ជាឯកសារឌីជីថល​​ក្នុងគុណភាពខ្ពស់មួយ ដើម្បីបង្ករភាពងាយស្រួលក្នុងការសិក្សាស្រាវជ្រាវ​ប្រកបដោយប្រសិទ្ធភាពជាងមុន​​។ លើសពីនេះទៅទៀត លោកក៏បានប្រាប់ពីបច្ចេកទេសនៃការធ្វើឯកសារតាមបែបឌីជីថល ដែលអាចឱ្យអ្នកសិក្សាស្រាវជ្រាវងាយស្រួលស្វែងរក។

អនុប្រធានបណ្ណសារដ្ឋាន នៃក្រុមហ៊ុន ម៉េងលី ជេ. គួច អេឌ្យូខេសិន ម.ក ​ លោក សួស ស៊ុនឌី បានបង្ហាញអារម្មណ៍រំភើបរីករាយ​ និង​ថ្លែងអំណរអរគុណយ៉ាងជ្រាលជ្រៅក្រែងលែង​ ដែលព្រះរាជ​បណ្ណាល័យហ្លួងម៉ែបានអនុញ្ញាត​​ឱ្យក្រុមការងារបណ្ណសារដ្ឋាន​​បានចុះទស្សនកិច្ច​សិក្សា​​ស្វែងយល់បន្ថែម ​អំពី​បច្ចេកទេស និងចំណេះដឹង​ផ្សេងៗ នៃការរៀបចំទុកដាក់ឯកសារប្រកបដោយសុវត្ថិភាពនៅព្រះរាជបណ្ណាល័យហ្លួងម៉ែ។ ក្នុងនោះដែរ ​លោកក៏បាននាំយកសៀវភៅដែលជាស្នាដៃនិពន្ធ​របស់អ្នកឧកញ៉ា វេជ្ជបណ្ឌិត គួច ម៉េងលី មួយឈុត​​ជូនទៅដល់​គណៈគ្រប់គ្រងព្រះរាជបណ្ណាល័យហ្លួងម៉ែ​​ផងដែរ។

សូមជម្រាបជូនថា ព្រះរាជបណ្ណាល័យហ្លួង​ ត្រូវបានបង្កើតឡើងដោយមជ្ឈមណ្ឌលឯកសារកម្ពុជា ដែលជាអង្គការក្រៅរដ្ឋាភិបាល​ មិនស្វែងរកប្រាក់ចំណេញ​​ ដែលមានទីតាំងស្ថិតនៅភូមិគ្រឹះលេខ១១ ផ្លូវ២៥៦ ភ្នំពេញ ដែលដាក់ដំណើរការឱ្យសាធារណជនចូលទស្សនាតាំងពីឆ្នាំ២០២០ ជាកន្លែងផ្តល់នូវការអប់រំបន្ថែមទៀតសម្រាប់ប្រជាជនកម្ពុជា។ មជ្ឈមណ្ឌលឯកសារកម្ពុជានេះ មានវត្តមាននៅក្នុងព្រះរាជាណាចក្រកម្ពុជា​ចាប់តាំងពីឆ្នាំ១៩៩៥ ក្នុងរូបភាពជាកម្មវិធីមួយរបស់សាកលវិទ្យាល័យ យែល សហរដ្ឋអាម៉េរិក ក្នុងគោលបំណងគាំទ្រ និងបង្កើតឱ្យមានការកាត់ទោសអ្នកដឹកនាំក្នុងរបបប្រល័យពូជសាសន៍។​

អត្ថបទ៖ អឿ ស៊ីណា ប្រធានផ្នែកប្រវត្ដិសាស្រ្ដ ម៉េងលី ជេ. គួច