សាលារៀន អន្តរទ្វីប អាមេរិកាំង (AIS) ដែលជាស្ថាប័នអប់រំឈានមុខគេមួយនៅកម្ពុជា នៅថ្ងៃទី២២ ខែសីហា ឆ្នាំ២០២៤ បានដាក់សម្ពោធឱ្យប្រើប្រាស់ជាផ្លូវការ នូវអគារសិក្សាថ្មីបន្ថែមសម្រាប់សាខាចោមចៅ ដែលជាសមិទ្ធផលថ្មីមួយទៀតរបស់ក្រុមហ៊ុន ម៉េងលី ជេ. គួច អេឌ្យូខេសិន ម.ក។

ពិធីសម្ពោធអគារសិក្សាថ្មីនេះ មានការអញ្ជើញជាអធិបតីពីអ្នកឧកញ៉ា វេជ្ជបណ្ឌិត គួច​ ម៉េងលី ស្ថាបនិក ប្រធានក្រុមប្រឹក្សាភិបាល និងជាអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន ម.ក ព្រមទាំងលោកជំទាវ។ ជាមួយគ្នា ក៏មានការអញ្ជើញចូលរួមពីគណៈគ្រប់គ្រងសាលា ចាងហ្វាង លោកគ្រូ អ្នកគ្រូ រួមទាំងបុគ្គលិកគ្រប់ជាន់ថ្នាក់ជាច្រើនរូបទៀត។

ថ្លែងផ្ដល់បទសម្ភាសជូនក្រុមអ្នកសារព័ត៌មាន អ្នកឧកញ៉ា វេជ្ជបណ្ឌិត គួច​ ម៉េងលី បានបញ្ជាក់ឱ្យដឹងថា៖ «មូលហេតុដែលសាលារៀន អន្តរទ្វីប អាមេរិកាំង (AIS) ដាក់សម្ពោធឱ្យប្រើប្រាស់ជាផ្លូវការនៅសាខាចោមចៅនេះ ដោយសារតែនៅតំបន់ចោមចៅកំពុងមានកំណើនសិស្សានុសិស្សយ៉ាងខ្លាំង ដែលតម្រូវឱ្យសាលារៀនត្រូវពង្រីកសាខាថ្មី»។

អ្នកឧកញ៉ា វេជ្ជបណ្ឌិត គួច ម៉េងលី អះអាងថា៖ «បច្ចុប្បន្ននេះសាលារៀន អន្តរទ្វីប អាមេរិកាំង កំពុងទទួលបានទំនុកចិត្តពីអ្នកអាណាព្យាបាល ក៏ដូចជាឪពុកម្ដាយរបស់សិស្សានុសិស្សច្រើន។ ជាក់ស្ដែង សិស្សដែលរៀននៅសាលារៀន អន្តរទ្វីប អាមេរិកាំង ភាគច្រើនបានប្រឡងជាប់ដោយជោគជ័យ និងមានគុណភាព»។

ជាការកត់សម្គាល់ អ្នកឧកញ៉ា វេជ្ជបណ្ឌិត ​​​គួច ម៉េងលី សង្កត់ធ្ងន់ថា៖ «ការពង្រីកឱ្យមានសាខារបស់សាលារៀន អន្តរទ្វីប អាមេរិកាំង ច្រើនបែបនេះ ដើម្បីចូលរួមចំណែកជាមួយរាជរដ្ឋាភិបាលកម្ពុជា ក្នុងការអភិវឌ្ឍវិស័យអប់រំ។

អ្នកឧកញ៉ា វេជ្ជបណ្ឌិត គួច ម៉េងលី ចាត់ទុកវិស័យអប់រំជាទ្រព្យសម្បត្តិដ៏ល្អអស្ចារ្យ​គ្មានអ្វីប្រៀបផ្ទឹមបានឡើយ។ អ្នកឧកញ៉ា វេជ្ជបណ្ឌិត អំពាវនាវដល់ឪពុកម្ដាយ ឬអ្នកអាណាព្យាបាល មេត្តាគាំទ្រ និងលើកទឹកចិត្តដល់កូនៗឱ្យបានសិក្សារៀនសូត្រ យ៉ាងហោចណាស់បានដល់ថ្នាក់ទី១២ ហើយបើអាច គួរតែឱ្យកូនៗបន្តសិក្សាដល់កម្រិតថ្នាក់មហាវិទ្យាល័យកាន់តែជាការប្រសើរ។

សូមបញ្ជាក់ថា អគារសិក្សាសាខាចោមចៅថ្មីនេះ គឺអាចដាក់សិស្សានុសិស្សបានរហូតដល់ទៅជាង ១២០០នាក់ ហើយក្នុងអគារសិក្សាទាំងមូល គួរឱ្យចង់សិក្សា មានភាពធំទូលាយ និងមានបរិយាកាសស្រស់ស្រាយ។ មួយវិញទៀត សាលារៀន អន្តរទ្វីប អាមេរិកាំង ក៏មានការបំពាក់ទៅដោយសម្ភារបរិក្ខារទំនើបៗ និងសម្បូរបែប ដើម្បីបំពេញដល់ការសិក្សាស្រាវជ្រាវ និងធ្វើការពិសោធផ្សេងៗផងដែរ។

យ៉ាងណាមិញ នៅអំឡុងខែកញ្ញា ឆ្នាំ២០២៤ខាងមុខនេះ ក្រុមហ៊ុន ម៉េងលី ជេ. គួច​ អេឌ្យូខេសិន ម.ក ត្រៀមនឹងសម្ពោធដាក់ឱ្យប្រើប្រាស់អគារសិក្សាថ្មីចំនួន៤សាខាបន្ថែមទៀត ពោលគឺនៅសាខាទួលសង្កែចំនួន២ និងសាខាចំការដូងចំនួន២។ នេះបើតាមការបញ្ជាក់របស់អ្នកឧកញ៉ា វេជ្ជបណ្ឌិត គួច ម៉េងលី៕

អត្ថបទដោយ៖ យឺន សីហា